Open Airs, Konzärt, Sounds
Es het alles in de 80er Joor agfange: „D Lydeschaft für Live-Musik unter freiem Himmel!“ Open-Airs und Konzärt zämme mit tuusige Glychgsinnte. Stell dr vor meh hört d Stimme uf dr Bühni chuum, will tuusigi im Takt mitsinge. Wouw, s lauft mr grad chalt de Rugge ab. Für mehrtägigi Open-Air hämmer immer s Zält drby gha. S het damals my hüttigs Wääse uf e glüggseeligi Art und Wiis gformt.
Mittedrin, scheen & unvergässe isch`s gsi! No hüt teilt d Musik de Alltag mit mr.
Willkomme bi mym ganz perseenlige Open-Air und Konzärt – Rückbligg:
| Jahr | Wer | Anmerkung |
|---|---|---|
| 1981 | Barclay James Harvest – „Out in the Green“ Festival | „Joggeli“ Basel / I lieb en hüt no, dä Sound! |
| 1982 | Rolling Stones | „Joggeli“ Basel / strömende Rääge, aber s „Null plus Ultra!“ |
| 1983 | Supertramp, Joe Cocker, Chris de Burgh | „Joggeli“ Basel / I lieb en hüt no, dä Sound vu Supertramp! |
| Manfred Mann’s Earth Band „Somewhere in Africa“ | St.Jakobshalle Basel | |
| 1984 | Santana, Bob Dylan | „Joggeli“ Basel / Schlicht, e geniale Gittarischt. Am Schluss hän dr Carlos und de Bob d Bühni gmeinsam grockt. Genial und cool isch`s gsi! |
| 1985 | Lucia Dalla „Viaggi organizzati“ | Hallestation Züri / Zum träume, wunderschön gsi! |
| 1986 | Andreas Vollenweider & Friends „Down to the moon“ | Muschtermäss Basel / Es isch komplett gschtuehlt gsi, was my am Afang irritiert het. Zu „Down to the moon“ jedoch absolut clever. Me isch fasch im Bode versunke. Geniale und wunderschöne Sound! Isch en Erläbnis gsi! |
| Vasco Rossi „Cosa succede in città“ | St.Jakobshalle Basel / Absolut cool gsi! Het für mi bis hüt die beschte Songs us Italie. Wie bim Lucia Dalla sin`s über 70% wiiblichi Fans gsi. | |
| 1987 | U2 „Joshua Tree“ | „Joggeli“ Basel / Dr neu Hit With or Without You isch absolut i gschlage! Ich lieb dr alt Sound vunene! |
| Tina Turner „Break Every Rule“ | „Joggeli“ Basel / Eifach „Power“ pur und das in hohe Absätz 🙂 E Wucht, die Tina! | |
| 1988 | Michael Jackson „Bad“-World, Kim Wilde | „Joggeli“ Basel / S erscht mohl in dr Schwiiz! Eifach vu Afang bis am Schluss, perfekt! Und s Tanzbei, eimolig! |
| Pink Floyd „A Momentary Lapse of Reason“ | „Joggeli“ Basel / „THE BEST, EVER“ inkl. dr Show | |
| 1990 | Santana; Andreas Vollenweider, Polo Hofer, Vera Kaa | Open Air St.Gallen / Ca. 30`000 im ussverchaufte „Sittertobel“. Sit däm Wuchenänd ghört dr Begriff „Schlammgalle“ fescht zur Schwyzer Feschtivalkultur. Är bschrybt die unerschütterligi Mentalität vo de Bsuecher, wo sich d Fyrlune au vo chnühtiefem Schlamm und Duurräge nid verdärbe loo hän. Hauptsach d Gugge isch troche bliibe 😉 |
| Roger Waters „The Wall“, Bryan Adams, Cyndi Lauper, Scorpions, Sinéad O’Connor etc. | Rockoper in Berlin, auf dem Potsdamer Platzum | |
| Prince „Nude“ | „Joggeli“ Basel / Absolut de Hammer gsi! Aschliessend d After-Show Party im Bora-Bora, Hilton. | |
| Patent Ochsner „Schlachtplatte“ | Mehrzwägghalle Stein (AG) / … „Scharlachrot und Bälpmoos“ eifach schön! | |
| 1992 | Genesis „We can`t dance“ | „Joggeli“ Basel / Impossant, i drügglig und wunderschön! S Schlagzüüg-Duell mit em Chester Thompsom, e Sensation! |
| 1994 | Marillion „Brave“, Status Quo | Open Air in Chur / Marillion mit Steve Hogarth. D Bühni am Fuess vum Calanda-Gebirge. Sensationelli Oobestimmig und Atmosphäre! |
| Gotthard; Status Quo, Truck Stop etc. | Open Air Schupfart | |
| Pink Floyd „The Devision bell“ | „Joggeli“ Basel / No hervorragender als s erschte Konzärt vo 1988! Unübertroffene Sound und e gewalt`s Show amene superheisse Summertag! S erscht mohl uf ihrer Europa-Tour hän sie „The Dark Side of the Moon“ gschpielt. Wär kennt`s nid !? | |
| 1997 | Michael Jackson „History World“ | Z ersch vum Muttenzer Brüggli us gluegt und denn an dr Birs glääge & dr Sound gnosse, will mr bim Wääg zum Stadion Lämmpe kriegt hän. (Dass han i au nur für e Frau gmacht, süsch wär i ihne 🫣) |
| Phil Collins „Dance into the Light“ | Hallestadion Züri / Sensationell! Uf ere runde Bühni duellierte sich dr Phil und Ricky Lawson je uf emene Schlagzüüg, während dr Percussionist Luis Conte sie beglaitet het. So I drügglig, denn die rundi Bühni in dr Mitti vu dr Halle het`s möglich gmacht, dass d Fäns runduhme hän chöne flippe. Unvergässlich! | |
| 1999 | Hartmut Engler „Abenteuerland“ – Live at Sunset Festival | Landesmuseum Züri / Sehr schöni Stimmig! Dr Innehof isch vollständig mit ere Muur umgäh. Ca. 2500 Bsuecher hän platz. Idrügglig und schön gsi! |
| Uriah Heep „Sonic Origami“ | Z7, Pratteln | |
| 2001 | AC/DC „Stiff Upper Lip„ | „Joggeli“ Basel / die gröscht Show het`s Wätter botte. Pünktlig vor Ydunkle isch e heftige Gwittersturm über Basel zoge. D Atmosphäre im Stadion isch dur d Wolke wo ufzoge sin, d Blitz und dr Sturm absolut elektrisierend gsi und het perfekt zu Hells Bells oder Thunderstruck passt. Sisch troche bliibe und dr strömendi Räge het ca. e halb Stund vor Konzertändi a gfange. S Volk jedoch het eifach unbeidruggt witer gfiirt. Do`s summerlich warm gsi isch, isch s Wätter für e AC/DC Konzärt s Püngtli uf em „i“ gsi, de Wahnsinn! |
| 2004 | Ganga Giri | Australia Open Air Gommiswald, St.Gallen / 1 Wuche im Zält uf ere hügelige Wiese. Dr Schönheitsfehler, dr Buur het sLand nid gschnitte. Sondern vo Geisse abefrässe loh. Ussgseh wunderbar, doch alles voll „Bölleli“ 🫣 Aber dr Ganga Giri, e Didgeridoo-Virtuose us Auschtralie wo für si mitrissendi Fusion us traditionelle Aborigines-Kläng und elektronische Dance-Beats bekannt isch. Phänomenal, doch noch 3 Daag hämmer abbroche. |
| Joe Cocker – Live at Sunset-Festival | Landesmuseum Züri / Sehr idrügglig. E chleini Azahl Bsuecher innere „Burg“ ähnliche Kulisse näb em Platzspitz. Sehr intim und mit em „Cocker“…., absolut genial gsi! |
Sänger und Bands wo i laider nie live gseh ha, aber für my hüt no en „Ohreschmaus“ sind :
- Elvis, The Beatles, Lynyrd Skynyrd, Simple Red, Aerosmith, Jean-Michel Jarre, Eminem, ZZ Top, Linkin Park (Chester Bennington), Queen, Bob Marley, Peter Tosh, Johnny Guitar Watson, Fleetwood Mac, Jimi Hendrix, Tote Hosen, Rammstein, Procol Harum
- E fantastisch`s „Mitbringsel“ us Australie: Tash Sultana (uf YouTube: „Jungle“ (Live Bedroom Recording) ein Muss und au dr erschti vu 3 Track`s „Virtual Session Performance„!)
S folge no e paar …..