E Traum als Schlüssel zur Wohret

«S Rätsel isch klärt und s Bild usem Traum, entschlüsslet.»

Zwüsche mim Achte und Nynte Lääbesjoor het mi immer wieder de gliich Traum begleitet, wo mir immer meh Frooge uffgworfe het. Was söll das, wieso? Im Spital bin i bis denn no nie gsi, doch sBild isch immer klarer worde. S zeigt mi Mami und dr Papi, wie sie mi als Baby im Spital chöme cho hole und mit mr imene Auto heime fahre. Was han i im Spital gmacht? Worum het mi sMami abgholt und isch nid bi mir gsi?

Irgend e Bild oder e Traum VOR dere Szeene, han i anschienend eifach nie wohrgno, isch eifach nie erschiine.
Frooge über Frooge und sBild im Traum isch immer dütliger worde. I ha sMami und dr Papi richtig gseh und mi tatsächlich am Mami in de Arme gfühlt. So klar isch dä Traum worde. Jo, das het mi scho beschäftigt. Wär hät mir also chönne hälfe, wenn nid sMami.
Ich han minere Muetter e paar Mool dervo verzellt, und denn isch ihre au bewusst worde, dass mi das Ganze immer meh beschäftigt und zu keim Ändi führt.

Amene Obe isch dMuetter am zNacht choche. I bi im Eggbank gsässe und cha mi no guet dra erinnere, wie dr Vatter sich nach em Ässe immer so schreeg in dEgge vu dr Eggbank gleggt het. Aber wenn ich das gmacht ha, het’s vum Vater ghaisse: «Uff, sitz richtig ahne!»

Aber, zum Thema zrugg. I ha mini Muetter eimohl meh gfroogt, eb sie sich chönn vorstelle worum i immer wieder dää Traum ha.
Will ai Nacht dervoor isch es wider emol so wyt gsi. Es het se sälber beschäftigt und shet ere au kei Rueh meh gloh.
Sie isch hald au e typische «Fisch» wie ich, sprich e absolute Gfühlsmensch.

Sie het mi agluegt und gsait: «Andy, das Bild wo sich immer wieder zeigt, dass ich und dr Vater di im Spital abhole, dass isch richtig. Aber es isch nit sSpital, es isch sChinderhaim in Basel gsi. Bevor du ei-jährig bisch gsi»

Oook, dert bin i platt & sprochlos gsi. Was isch denn jetzt lohs? Aber i ha’s minere Muetter hoch a grächnet dass sie mi uffklärt het, denn im gliiche Atemzug het sie mr gsait, ich dörf em Vater aber jo nüt sääge. Will, sie hätt mir das nie dörfe verzelle. Dass sig e Abmachig, wo i spöter vum Vater scho emohl erfahre wird. Wouw, als 8,9 Jährige het mi das scho gschockt.

Tatsächlich han i mi Mami uf Hände trait, denn dä Traum isch wie verflooge. Dass, het scho mohl guet do. Bi paff gsi, doch snäggscht Froogezeiche isch natürli a`gschtande. I ha au gschpürt, dass es dr Muetter scho nid wohl isch gsi. Aber i ha mi Vater jo kennt und somit gwüsst, das Gheimnis zwüschem Mami und mir…, muess bi mir bliebe.