„S Schicksal frogt nid um Erlaubnis, wenn`s zueschloot. Aber s zeigt aim wie unfassbar wärtvoll s Lääbe cha si, wenn me sich`s nach emene Schicksalsschlaag, wider zrugg erobere darf und cha.“
Dr Usslöser und Grund worum i mi Website ins Lääbe gruefe ha, sin myni Memoire. I ha einiges erläbt wo mi prägt het. Zweimool het mi e Schutzängel am Chraage paggt und wiider zrugg ins Lääbe gholt. Ohni d Hilf vo mine Liebschte und jo, me muess es eso saage – mine Schutzängel, wär i unterdesse scho lang nüm do. Für mi isch es e Wäg, zum mi Lääbe Revue passiere z loh und einigi Erläbnis e weneli z verarbeite.
„Es git Augebligg im Lääbe, do hebt en Ängel für e churze Momänt d Zyt a. Mit e weneli Gligg ermöglicht`s aim chönne z entscheide, dr richtig Wäg witer dörfe z goo.“
