E Traum, dr Schlüssel zur Wohret

«S Rätsel isch klärt und s Bild us em Traum, entschlüsslet.»

Zwüsche mim achte und nynte Lääbensjoor het mi immer wieder dr gliich Traum begleitet, wo mir immer meh Frooge uffgworfe het. Was söll das, wieso? Im Spital bin i bis denn no nie gsi, doch s Bild isch immer klarer worde. S zeigt mis Mami und dr Papi, wie sie mi als Baby im Spital chömme cho hole und mit mir in eme Auto heime fahre. Was han i im Spital gmacht ? Worum het mi s Mami abgholt und isch nid bi mir gsi?

Frooge über Frooge, und s Bild im Traum isch immer dütlicher worde. Ich ha s Mami und dr Papi richtig vor mr gseh und mi tatsächlich am Mami in de Ärm geborge gfühlt. So klar isch dä Traum worde. Jo, das het mi scho beschäftigt. Wär hätt mir also chönne hälffe, wenn nid s Mami. I han mis Mami e paar Mool dervo verzellt, und denn isch ihre au bewusst worde, dass mi das Ganze immer meh beschäftigt und zu keim Ändi führt.

An eme Obe isch s Mami am z Nacht choche. Ich bi in dr Eggbangg gsässe und cha mi no guet dra erinnere, wie dr Vater sich nach em Ässe immer so schreeg in Egge vo dr Eggbangg gleit het. Aber wenn ich das gmacht ha, het’s vom Vater ghaisse: ‚Uff, sitz richtig aane !

Aber zum Thema zrugg: I ha mis Mami eimool meh gfroogt, eb sie sich chönn vorstelle, worum i immer wieder dä Traum ha. Will ai Nacht devoor isch es wieder emol so wyt gsi. Es het se sälber beschäftigt und es het ere au kei Rueh meh gloh. Sie isch hald au e typische ‚Fisch‘ wie ich, sprich: en absolute Gfühlsmensch.

Sie het mi agluegt und gsait: ‚Andy, das Bild wo sich immer wieder zaigt, dass ich und dr Papi di im Spital abhole, das isch richtig. Aber es isch nit s Spital, es isch e Chinderhaim in Basel gsi. Das, bevor du ei-jährig gsi bisch.‘

Oook, dert bin i platt und sprochlos gsi. Was isch denn jetzt looss? Aber i ha’s am Mami hoch a grächnet, dass sie mi uffklärt het und mi bedanggt. Denn im gliiche Atemzug het sie mir gsait, ich dörf aber am Papi jo nüt sage. Will sie hätt mir das nie dörfe verzähle. Das sig e Abmachig, wo i in spötere Joore vum Papi scho emol erfahre wird. Wouw, als 8, 9-Jährige het mi das scho gschockt. Und natürlich au beschäftigt. Keinem sage !? Dr Schwöschter nid, mim beschte Fründ nid…., das wird nid eifach.

Tatsächlich han i mis Mami uff Hände drait, denn dä Traum isch wie verflooge. Git`s jo nid, doch das het scho mool schwer guet do. Ich bi paff gsi, doch s nägschte Froogezeiche isch natürlich a gschtande. Ich ha au g schpürt, dass es am Mami scho nid wohl isch gsi. Aber ich ha mi Papi jo kennt und somit gwüsst, dass das Gheimnis bi mir und em Mami bliibe muess.

Falls d Froog „Wänn mr`s em Chind sage ? Wenn isch dr richtig Zyt-Punkt ?“ au di betrifft, git`s nur ei Antwort. So früeh wie möglich. Erscht rächt wenn Frooge uftauche. Denn isch Zyt, Red und Antwort z biete. Je meh Joore vergöhn, desto schwerer wird s Verarbeite für alli Betroffene.

Natürlich wird mi das Thema no Joore, immer wieder emol begleite. Doch dä riese Fels, die grossi Lascht als 8/9 Jährige nid z wüsse wieso mi e Traum verfolgt und nid zur Rueh cho loht, het sich klärt und isch tatsächlich ab däm Tag verschwunde. Au isch`s Gheimnis vum Mami und mir, am Papi gägenüber nie glüftet worde. Wie de „Vorhang“ zwüsche em Papi und mir Joore spöter gheit isch…, in eme andere Kapitel.